باقى القصة

السلام عليكم ورحمة الله وبركاته
انا قلت اكلم لكم باقى القصة علشان تشوفوا ان فى بعض الأماكن مستوى التعامل فيها سىء للغاية
بعد نصيحة من شخص ما قالى لازم تدفعى الفلوس للاستديو وتاخدى صورك لان الصور عندهم ولو مدفعتيش باقى الفلوس انتى مش ضمانة يعملوا ايه بالصور ممكن يحصلك مشاكل بسبب الموضوع دا وممكن يعملوا على الصور او اى حاجة انتقاما منك على الخمسة جنيه
قلت مش مهم الوقت اللى ضاع ومش مهم الخمسة جنيه المهم اخد الصور
رحت تانى يوم اخد الصور وصلت لاقيتم بيقولوا الصور مجتش من المعمل الصراحة انا عملا بالنصيحة منطقتش ومشيت
تانى يوم بعت حد يشوف لى الصور علشان لو كنت روحت كنت هقل ادبى بقه واللى يحصل يحصل
لاقت الاستديو قافل لأنه كان يوم وقفة عرفات
تالت يوم بعت ابن اختى تانى وكان أول ايام العيد قالوا اه الصور جت
روحت لهم انا فى المساء علشان اخدها
صاحب الاستديو قالى الصور جت
بس مش هنقدر نسلمها لك لأنها لسه متعملتش على الكمبيوتر ومش هينفع تاخديها كده
قلت له لا شكرا انا عاوزة الصور كده
قالى لا مش هينفع
قلت له هات الفلوس
راح ادينى الفلوس
قلت له اقطع الصور دى
قطعها الصراحة
انا عارفة انه عنده نجاتيف بس انى كنت هطق
رحت قايلة له انت ستديو مش محترم ومتعرفوش يعنى تحترموا الناس ودى اخر مرة ادخل فيها المكان دا
وعلى فكرة انا كمان مش محترمة انى جيت هنا
وسوءت سمعت الاستديو فى كل مكان حقيقى
مخلتش حد اعرفه فى المنطقة غير وقلت له
ورحت استديو تانى فى شارع جانبهم محترم حقيقى بس انا مكنتش اعرفه
وواتصورت وقلت لهم اللى حصلى فى الاستديو الأول
اللى غظنى وحرق دمى اوى انه الشاب اللى صورنى قعد يقولى تعرفيه لما تشوفيه الصور مش هتزعلى ابدا
قلت له هو انا مش عارفة نفسى هو انت مصور واحدة غيرى
والصراحة لما شفت الصور وقد ايه مستواها الفنى هابط جدا فى الإضاءة وفى كل شىء مزعلتش ابدا على رأى الشاب الوطنى دا بتاع انتى أزاى بتغلطى فى المصريين
ومع تحيات شيرين
مشربتش من الترعة
اشرب من البحر
او اخبط راسك فى الحيط

النعرة الكدابة

السلام عليكم ورحمة الله وبركاته

حقيقى وحشتونى جدا ووحشنى التدوين بس كنت مش عارفة اكتب او حاسة إحساسات غريبة كده الحمد لله استقريت نفسيا شوية

غريبة اوى طبع المصريين عندهم نعرة وطنية كدابة بشكل غير طبيعى يعنى الواحد من دول لو جبت سيرة المصرى بسوء قدامه يعملك فيها عنتر بن شداد وهو أول المخربين فى الوطن فاهمين ان حب الوطن إن أأقول لو لم اكن مصريا لوددت أن أكون مصريا

حب الوطن إنى ااقول مشربتش من نيلها طب جربت تغنيلها -

وفى تناسى نهائى أن حب الوطن دا عمل وكفاح وتنمية وقيم ومبادىء

موقفين مريت بيهم أكدوا لى الحكاية دى وانا هعرضهم عليكوا وقولوا رأيكم

الأول انا مشتركة فى حمام سباحة بتمرن فيه بصفة منتظمة على السباحة

المهم ان يوم من أيام التمرين روحت وجد أن المدربات مشيوا كلهم ولغوا التمرين

طبعا انا واخدة إذن من الشغل بسبب التمرين ونازلة فى الساعة.30 2 وانتوا عارفين القاهرة الساعة 2.30 لحد ما وصلت كانت الساعة 4

طبعا انا دمى اتحرق كلمت المسئول عن الحمام

طبعا منتهى اللامبالاة عادى جدا وايه يعنى لما التمرين اتلغى وقت الناس دا مالوش قيمة نهائى وايه يعنى لما اضيع وقت الناس

لكن اللى غظنى انه قالى قدر الله وما شاء فعل يمكن لو كنتى نزلتى انهاردة كان حصلك حاجة

رديت قلت له ما هو الدين الشماعة اللى بنعلق عليه اخطائنا الكلام دا حضرتك تقوله لما تعمله اللى عليكوا وتقولوا من قبلها ان التمرين ملغى فى اليوم دا لكن احنا بنستخدم الكلام دا علشان نبرر اخطاءنا والاستهتار بمقدرات الناس لكن كل واحد ميعملش اللى عليه ويرجع يقول دا نصيب وهو دا للأسف اسلوب المصريين، وسبته ومشيت.

الموقف التانى

اتصورت فى استديو وكان ميعادى لاستلام الصور يوم السبت مساء

روحت يوم السبت لاقيت الاستديو قافل

روحت يوم الأحد قالى اتفضلى حضرتك نص ساعة وتكون الصور هنا

دار الحوار الآتى

انا : يعنى ايه نص ساعة انا ميعادى امبارح المفروض اجى الاقى الصور موجودة

هو : عادى يا آنسة دى نص ساعة

أنا : أنا وقت غالى ومحبش تضيع الوقت بالشكل دا

هو : اصل ظروف وغصب عنى

انا : انا ماليش علاقة بالظروف دى ومش المفروض اتحملها دا شغلك انت انا مش بحب طبع المصريين دا فى تضييع الوقت

هو: انتى بتغلطى فى المصريين يعنى ايه طبع المصريين انا غصب عنى انا عندى ضغط شغل

طبعا الباشا اخدته حب الوطن اوى ازاى انا غلطت فى المصريين وقلت انهم بيضيعوا الوقت

قعدت وهديت كده وقلت له

انا : احنا عندنا اخطاء لابد ان نتعرف بيها اللى يغلط يقول انه غلط ومش يصمم على الغلط

هو : بس انا اتضايقت علشان غلطتى فى المصريين هو انتى مش مصرية

انا : مصرية وعمرى ما سافرت برة مصر لكن الخطأ يجب ان يقال عليه خطأ ودى تصرفات غلط كلنا بنعملها المفروض نغيرها

هو : نص ساعة والصور تكون موجودة

عدت نص ساعة والصور مجتش طبعا

قالى طب ممكن تروحى وترجعى كمان ساعة تاخديها انا هقعد انتظر حضرتك

قلت له انتوا ضيعتوا لى وقت طويل اوى كان ممكن استفيد منه فى اكتر من حاجة

رجعت بعد ساعة لاقيت الباشا قفل ومشى اصلا

قلت فعلا وطنى جدا عارف يعنى مسئولية ويعنى ايه شغل

كأن الوطنية دى لبتوع المظاهرات

او تظهر لما حد يجيب سيرة المصريين

لكن مفهوم الوطن وخدمة الوطن فى الضياع نهائى

ومفهوم الدين والمقولات الدينية نستخدمها لتبرير اخطائنا

وهى دى فعلا النعرة الكدابة

انا محروق دمى اوى يا جماعة وخصوصا من بتاع الاستديو دا

لكنى هخاد الصور ومش هدفع باقى الفلوس

ودا تمن وقتى اللى ضاع ودرس ليهم علشان يعرفوا يتعاملوا مع الناس ازاى بعد كده

دعواتكم

انا عندي حنين ما بعرف لمين

فى حالة لا تسمح بالكتابة نهائى

دعواتكم

الدراما فى رمضان

كل عام وانتم بخير وبصحة وبسعادة

ويارب الكل يكون شغال فى رمضان كويس

زمااااااااان ونا صغيرة كان رمضان بالنسبة لى فوزاير ومسلسلات وافلام

وبعد أن بدأت افهم المغزى من رمضان وابتعدت عن هذا الهرج الذى يفسد رمضان

بدأت افهم ان رمضان للعبادة وليذوق الإنسان حلاوة القرب من ربه

لكن بقى شىء يشغل بالى كثيرا لماذا فى رمضان تعج القنوات التليفزيونية ؟

لماذا يكون السباق فى

كيف تخُرج هذه القنوات الناس من المود الإيمانى والروحانيات ؟

بل وبالعكس لا تخُرج الناس فقط من الحالة الإيمانية ولكن تخرب الأخلاق والقيم

فطول السنة هناك من المسلسلات والدارما التى تفسد الناس وتفسد القيم

ولكن فى رمضان يشتد الأمر ليصل إلى ذروته

وكأن لسان حالهم يقول لو الناس اذقات طعم العبادة فى رمضان

وعرفت حلاوتها ستترك كل هذا الزخم

وستكرهه بعد رمضان ولم يعد لنا سوق بعد ذلك

فنكثف عليهم فى رمضان ليفقدوا هذه الروح

ومازال السؤال يلح عليا

من الذى حول رمضان من شهر العبادة لشهر التليفزيون والدراما ؟

واين الرقابة الدينية من هذا الموضوع اين منابر العلم مثل الأزهر

واين الدولة التى فى الأساس تقيم على اساس ان دينها الإسلام؟

ومن منكم يجد عندها إجابة او تاريخ هذا التحول ياريت يقولى

الضيف الكريم

ايام قليلة ويهل علينا ضيف كريم

انتظره من العام للعام لكى ينير لى الطريق العام كله

فهو يملىء الدنيا بهجة وفرحة وامل وحب

يهل علينا عبيره من بعييييييد فتملاء روائحه المكان

يفيض املا وصفاء على العالمين

الكنز الذى ننهل منه لكى نصرف منه طوال العام

فعندما يأتى تفتح الكنوز ويقال لك

هلم تأخذ من الجواهر الثمينة كما يحلو لك

فمادام هو معنا نأخذ من كنوزه كما يحلو لنا

وندخر منها فنأخذ فى السكون وفى الحركات وفى النوم وفى اليقظة

يعيد إلى الروح طاقتها وإلى النفس توازنها وإلى القلب دفئه وإلى العقل صفاءه

ولكنه لا يمكث إلا قليلا فيفر من إيدينا ويتركنا على أمل لقاءه العام القادم

لكى يعيد إلينا الحياة من الجديد

رمضـــــــــــــــــــان

فما اجمل الحياة معك

فايامك لا يوجد مثلها

وليالليك هى الركن الدفىء والملاذ الأمان

فكم احب العيش فيك وكم احب ايامك

شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ وَلِتُكْمِلُواْ الْعِدَّةَ وَلِتُكَبِّرُواْ اللّهَ عَلَى مَا هَدَاكُمْ وَلَعَلَّكُمْ تَشْكُرُونَ

فالحمد لله على نعمة هذا الشهر

اللهم بلغنا رمضان وبارك لنا فيه

واجعلنا فيه من المقبولين

وارزقنا صيام نهاره صياما يرضيك عنا

وارزقنا قيام ليله قياما يرضيك عنا

وبلغنا ليلة القدر

وتقبل منا سائر الأعمال

وافتح لنا من رمضان باب لنصر الأمة

ولعزته

اللهم رد إلينا المسجد الأقصى الأسير

اللهم فك اسرى المسلمين

اللهم الهمنا العمل الصالح الذى يقربنا إليك

اللهم اجعل هذا العمل خالصا لوجهك الكريم واقبله منا يا أرحم الراحمين

وصلى اللهم وبارك على اشرف المرسلين

لا تنسونا فى رمضان فى من صالح دعائم

تقبل الله منا ومنكم

يعنى ايه حرية

تغيبت لفترة طويلة عن المدونة ولكن بجد مكنش عندى نفس اوى للكتابة

برغم حدوث اشياء كثيرة كان من الممكن الكتابة عنها

بحاول وانا ماشية فى الشارع انى ابحث عن حاجة إيجابية علشان اكتب عنها

بس لحد دلوقتى لسه مفيش فكرة معينة إيجابية خلتنى اكتب عنها

لكن طبعا بالنسبة للأفكار السلبية فدا حدث ولا حرج

لما ببص فى تصرفات الناس بستغرب هى الناس شايفة الحرية دى ازاى

يعنى ايه حرية؟

اكتر الناس فاهمة الحرية دى يعنى تعمل اللى هى عاوزه فى الوقت اللى هى عاوزه بالطريقة اللى هى عاوزها دون ادنى مراعاة لأى ظروف أخرى

ناخد مثال على كده

عريس وعروسة فى زفة عربيات ومتوسكيلات كلهم ماشيين بشكل عشوائى وعروضة عسكرية بالموتسيكلات

وكلاكسات لا حصر لها

ولو اتكلمت وقلت ان دا غلط يبقى مش عاوز الناس تفرح ودا يوم ومش مشكلة

طب يا جماعة الواحد والله ما هو ضد إن الناس تفرح لكن احنا ثقافة الأفراح عندنا حرية بلا وعى

مثال أخر عندنا فرح فى الشارع شهر كامل وكل يوم الدى جى يشتغل من اول اليوم لأخره بأحط الأغانى السفيهة

اخر ما زهقت اضطررت انى اروح للناس واطلع لهم الشقة ودار هذا الحوار

انا : السلام عليكم انا جارتكم فى البيت اللى وراكم مش عارفة انام نهائى من الصوت العالى استأذنكم بس الصوت شوية

اهل البيت : يا اهلا اتفضلى اصل احنا عندنا فرح

انا : الف مبروك يا جماعة ربنا يتمم بخير يارب بس الصوت ارجوكم شوية

اهل البيت : ربنا يفرح الناس كلها دا فرح عقبالك وحاضر هنوطى شوية

انا : شكرا يا جماعة والف مبروك ولسان حالى ياريت متكرورهاش

هما الصراحة الصراحة طفوا الدى جى فى اليوم دا كله ومشتغلش تانى

وتانى يوم اشتغل تانى

هى دى الحرية من وجهة نظرهم

مثال أخر

واحد ماشى فى الشارع راكب عربية إن كان او ماشى على رجله بياكل اى حاجة

اسهل حاجة يرمى المخالفات فى الشارع

هو حر دا شارع الحكومة

انا مفهومى عن الحرية

ان فى فرق بين حرية التفكير وحرية التصرفات

التفكير بياخد مساحة كبيرة شوية من الحرية

اما التصرفات فهى ليست حرية مطلقة بل حرية مسئولة وتراعى حقوق الأخرين

بس ياريت لو حد عنده تعريف اخر للحرية يقولى عليه يمكن انا غلطانة

تفتيش مفاجى

خبر جديد برغم ما يحمل من مساوىء إلا انه خبر من نوع جديد وهو الاعتراف بالخطأ

والمراقبة

-----------------------------------

في تفتيش مفاجئ على قسم المنتزه.. 40 مواطن دون تهم وخمور وأسلحة

أمرت نيابة الإسكندرية بإخلاء سبيل 40 محتجزا فى قسم المنتزه بالإسكندرية وذلك بعد تفتيش مفاجئ على القسم .
جاء قرار النيابة بالإفراج عن المحتجزين دون ضمان لعدم وجود تهم معينة ضدهم.
وقال برنامج 90 دقيقة مساء الاثنين ان النيابة العامة فى تفتيشها المفاجئ على القسم وجدت خمور وأسلحة لم تقيد كأحرار.
الجدير بالذكر أن قسم شرطة المنتزه يحظى بسمعة سيئة حيث شهد القسم من قبل قيام النيابة بضبط 55 مواطنا محجوزين دون وجه حق ، كما وجدت محاضر موقعة على بياض من المحجوزين.

----------------------------------

اللى انا مستغربة له مثلا ان فى الصيف بتكون فى جرائم كتير وخصوصا فى الاماكن اللى بيكون فيها مصايف

يعنى من الممكن ان الضباط يجدوا قضايا كثيرة ينشغلون بها دا غير تنظيم المحافظات دى للتقليل من الجريمة والتيسيير على المواطنين المصييفين

ولا هما علشان ميتعبوش نفسهم يعملوا كده فى ناس ابراياء ويكبروا دماغهم واهو عندهم قضايا يعنى يقطعوا نفسهم

دا غير الأحراز دى بقه الواحد مش عارف للبيع وللمعارف

انا لما بعدى على قسم الشرطة فى المنطقة عندنا بشوف مركز مكافحة المخدرات بحس ان المفروض يتغيير اسمه لمركز بيع المخدارت

مصر دى بلد عجيبة فعلا وتفنع كلها على بعضها كده تبقى من عجائب الدنيا

الخبر نقلا عن

مصرواى

كلام سمعته

فعلا فى مجتمعنا حاجات غريبة اوى

تسمع كلام غريب عن اى منطق

وتشوف تصرفات غريبة عن اى واقع

ساعات من كتر ما بشوف حاجات غريبة بقول يمكن العيب فيا انا

انا اللى مش فاهمة

من كام يوم كنت فى كلية بدون ذكر اسماء

والحرس بتاع الكلية كان موجود

ودار هذا الحوار

بين مواطن عادى وامين شرطة

المواطن : انت عارف بعد ما ضربه وبهدله فى الشارع طلع ابن لواء وقاله انت مش عارف انا ابن مين

المواطن : وقعد يتأسف له ويقوله حقك عليا انا مكنتش اعرفك لكن الولد قاله انا مش هسيب حقى علشان متعملش كده مع اى مواطن عادى دا مش اسلوب تعامل ابدا.

امين الشرطة : طب وهو يعمله ايه هو كان يعرف ان ابن لواء

المواطن : طب والمواطن العادى انا وغيرى يتبهدل علشان خاطر مش ابن لواء مش لازم الناس تتعامل كويس وخلاص

أمين الشرطة : اهو مكنش يعرف بقه

سمعت الحوار دا وانا واقفة

وقلت فى عقلى هو دا المنهج اللى ماشية عليه الشرطة

اضرب المواطن واللى خلافوه

لحد ما نعرف مين ابوه

بس عجبنى موقف الولد اللى الحكاية عليه

لأنه تمسك بحقه مش علشان ابن حد ولكن علشان دا حقه وعلشان يدى درس للضربه ازاى يتعامل مع المواطين باحترام شوية

حسبنا الله ونعم الوكيل

هتجنن من الفرحة بجد

بصراحة انا مش عارف ااقول ايه ولا اعمل ايه
انا سعيدة جدا جدا
انهاردة حصلت حاجة غريبة ومشرفة فى الوقت نفسه
انا كان عندى شكوى بالنسبة للمكان الذى اسكن بيه
والمشكلة دى محدش يقدر يحلها غير الحكومة
وهى عبارة عن مجموعة من الناس تقوم بالتجارة فى انابيب البوتاجاز
وتخزن الأنابيب فى الشارع بدون اى مستودع او عناصر امان بل الانابيب طول اليوم فى الشارع دون مراعاة اى مخاطر نهائى

وان تحدث معاهم اى إنسان يبلطجوا ويقلوا ادبهم بدون اى رداع
انا دخلت موقع وزارة الداخلية وعملت شكوى
وبصراحة نسيت الموضوع ولم اتخيل ان يقوم احد بالرد عليا
وإذا بى بعد اسبوعين
اجد عميد من مباحث التموين بيتصل بيا على التليفون وبيقولى انه كلم القسم وهيبعت ضابط لتحرى الأمر
وإن لم يجد الإنابيب سوف يعود مرة أخرى وسياتبع الأمر
واعطنى رقم موبايله وقالى لو فى اى شىء اتصلى بيا
بصراحة انا مش مصدقة نفسى ان دا حاجة ممكن تحصل فى مصر
دا لسه فى حاجات كويسة اهو
واجهة مشرفة فى ناس لسه بتعامل ضميرها
بس ادعو لى ان فعلا يحصل خطوة بجد والحاجات دى يجى أمر بإزالتها علشان خاطر الناس
الحمد لله

اشمعنى اسمه تاج ؟

التاج دا جالى من حبيبتى حبيبة محمد صاحبة مدونة مستنية الفرج يارب يجى يارب

أنت مين؟

انا الملامين جامد ومتين انا إنسانة عادية جدا نفسى ااقابل ربنا ويكون ليا بصمة فى المجتمع
بحب عملى واسرتى واصحابى

مين اكتر ست شخصيات بتحبهم؟
انا مقدرش ااقول ان فى ست بس بحبهم بدرجة واحدة
القائمة طويلة جدا ومقدرش احدد منها ستة على رأس القائمة

أنت سعيد؟

السعادة دى عبارة عن لحظات
وكمان بتمر بسرعة
انا متأكدة ان مفيش سعادة مطلقة
لكنى ساعات بمر بأوقات سعيدة

لو أجتمعت أنت وحسنى مبارك فى غرفة واحدة هتقوله ايه؟
اتلم بقه يا أخى

ربنا ياخدك

لو معاك مليون ونص هتعمل بيهم ايه؟
هعمل مشروع يكون ليه تأثير إيجابى فى المجتمع ويخلق فرص عمل ويكون ليه دور فى التنمية

بتحب مصر؟
بحبها طبعا امال الواحد دمه بيتحرق علشانها ليه

بس حاسة انى قربت اوصل لمرحلة سيئة فى موضوع حبها دا

بتحب البنات؟
هو دا ليا كلهم احبابى

أنت مسلم؟
الحمد لله
مسلمة وبحب الإسلام

ليه؟

لأنى كلما بحثت اكثر فى الإسلام كلما وجدت ان الإسلام بيحمى المسلم من كل شر ويسخر له فى الكون كل شىء وبيهذب المشاعر ويسمو بها ويملأ الدنيا حبا وودا
لكن العيب فى المستخدمين

أيه اكتر موقف محرج أتعرضت ليه؟
لا اوبا المواقف المحرجة كتير موت يعنى الصراحة
بس حاجة مش بقدر انساها مرة كنت فى الاتوبيس ايام الدراسة ولاقت واحدة طلعت الاتوبيس ومكنش فيه مكان تقعد فيه وانا قاعدة وانا الصراحة مقدرش ااقوم لحد فى الاتوبيس علشان البهدلة يعنى كانت شايلة طفلة صغيرة قلت لها هاتى البنت واخدت البنت على رجلى
والبنت بقه مكنتش لابسة بامبرز وقامت بالواجب الصراحة وانا فوجئت طب انا هروح ازاى دلوقى شكلى كان زفت وطبعا مش معقول هتنرفز على الست هقوله ايه يعنى اديتها بنتها ونزلت من الاتوبيس وانا هموت من الغيظ.

اتصرفت ازاى؟

الحمد لله إنى كنت مروحة ومش رايحة حتة روحت
أيه الامنية اللى بتدعى ربنا انه يحققها ليك؟
إنه يغفر لى ويكتب لى رؤيته
ويصلح حال الأمة
واتجوز انا وصحابتى


عارفين لو حد باعت لى تاج تانى هو حر

حتى أنتِ يا سوريا

الرئيس بشار الأسد نجح فى الاستفتاء الشعبى الكبير المبجل

بنسبة 97% الصراحة

مش عارفة ااقول ايه

الف مبروك للرئيس

الف الف مبروك

مش عارفة اضحك ولا اعيط من الفرحة

مبروك لشعب سوريا

مبروك للشعوب العربية كلها

الحكومات العربية هتودينى مستشفى الامراض العقلية عن قريب إن شاء الله

ومش لاقية تعبيرات

الصراحة الرجل واخد تأييد اكتر من أى نبى مرسل

أو حتى المولى عز وجل الذى يرزقنا ووهبنا الحياة وكل هذه النعم التى نعيش فيها

اظن لو عملنا استفتاء هنطلع نسبة كفرة وإلحاد لا تقل عن 40% يعنى الرئيس بشار محبوب بشكل اكبر مما نتوقع

لو حد يعرف سبب الحب الكبير للحاج بشار يبقى يقولى الله يكرمكوا

النصابين اهما حيوية وعزم وهمة

من يوم ما سمعت عنها وانا أحسست بخديعة كبرى

كلما كلمنى عنها احد كنت اقول هى نصب واحتيال ولكن لا اعرف ما هى طريقة النصب فيها إلا ان عرفت

شركة شنيل

حتى الصين نصبت علينا

بعد عاااااااام كامل من النصب على المواطنين واخذ اموالهم بالباطل باسم الشفاء من الأمراض والكسب السريع

وحلم الشباب فى الثراء والمكسب السريع

اغلقت الحكومة ابواب الشركة

إلا صحيح هى الحكومة كانت فين ؟

الشركة صينية، واسمها" شينل"، والنشاط ترويج جهاز طبي تزعم أنه يعالج 45 مرضًا، والأسلوب: "تسويق مباشر" يتحول فيه المستهلك إلى موزع بعقد واحد، والنتيجة خمسون ألف (مشتر - موزع) وخمسون مليون جنيه خلال عام، والآلية : جبل من الأكاذيب والأوهام، والهدف: جني أرباح طائلة،
بداية هذه الشركة عملت فى حلوان فى ابريل 2006 بدأت فى التسويق وجذب الشباب

وإعطاء محاضرات فى التسويق والتنمية البشرية

والعقد بين الشركة والمشترى قائم على أن يكون الربح موزع بنسبة 55% للشركة و45 للمشترى وتتضاعف نسبة العمولة على اساس اتساع الشبكة وزيادة نسبة المشترين

الذي هو عبارة عن جهاز شبيه بجهاز الفاكس، يخرج منه طرفان كهربيان ينتهيان بقطعتي نسيج، تُوضعان على موضع الألم من الجسم، فتسببان نبضات أو تدليكًا كهربيًا، تتحكم في درجته من زر خاص في الجهاز، وهناك طريقة "الضمادة الحرارية"، وكلتا الطريقتين تؤديان إلى القضاء "الوقتي" على الألم.. في 45 مرضًا.. كما يقول مسئولو الشركة وكتيباتها التشغيلية، بدءًا من أمراض السكر وضغط الدم، وشلل الأطراف، والظهر، والقدم، والفصام، وحتى عدم القدرة "الجنسية"!

والمشترى يدفع الف جنيه قيمة هذا الجهاز برغم ان الجهاز لا يساوى 200 جنيه ولكن هذا المبلغ يدفع لأنك سوف تجنى ارباح من وراء بيع الجهاز

ولكن لم يعرض الجهاز على أى جهة طبيبة لإثبات صحته من عدمها او مدى تأثيره على الصحة وهل هو يعالج فعلا

ففى ظل غياب الرقابة عملت الشركة ونمت واصبح عدد المشتركين 50 الف مشترك

والحق يقال ان الحكومة قد أغلقت الشركة

بعد أن تسبب في إصابة بعض المواطنين بالسرطان، وانتقال بعضهم إلى العناية المُركزة، في حين ساءت أحوال البعض الصحية من جرائه، خاصة مرضى السكر، بل إن هناك سيدة تُوفيت بالفعل بعد أن استخدمته.

إلا صحيح هى الحكومة كانت فين ؟

طبعا فى ناس كتير انسوقوا ورا الأمر دا وبدأو فى الترويج للجهاز وعلى بيعه وفى ناس قامت ببيع ممتلكات لها برغم ان فتوى تحرم التسويق بهذا الشكل لأنه يضر بالمشترى

فتوى تحريمها

وطبعا فى ظل الإحباط والبطالة اللى بيعشوها الشباب

أعادة الشركة للشباب ثقته المفقودة بنفسه، وأزاحت عنه أدران الشعور بالإحباط الشديد، وهو شعور يلازم الكثيرين ممن تخرجوا في الجامعات بمئات الآلاف -ولا يجدون أي عمل يمتهنونه حاليًا- في جميع المحافظات، وهكذا شعروا حيالها بالامتنان الشديد، وبالارتباط العضوي والنفسي، ولم يكن غريبًا أن يعترضوا غاضبين على إغلاق الشركة؛ حيث "فتحت بيوتهم" كما هتفوا لحظة "تشميعها"، دون أن يدروا أنهم تعرضوا لخديعة كبرى، وأن الشركة تخوض بهم غمار بحر من الأوهام والأكاذيب.

وقطعا يجب على الحكومة دارسة هذا الأمر لخطورته ومعرفة اسباب انتشاره والحد منا

وإلا هيكون المجال مفتوح لنفس الحدث مرة اخرى وتحويل المجتمع من مجتمع يكسب لأنه ينتج ولكن يكسب لأنه ينصب ويستهلك فقط دا إذا كان بيكسب اصلا

بس لو حد عرف هى الحكومة كانت فين يبقى يقولى اصل انتوا عارفين مستوى الذكاء بتاعى منخفض شوية ومش عارفة هى كانت فين؟

------------------------------------------------------------

المصدر موقع إسلام اون لاين

-----------------------------------

التاج اللى يجى لك منه الريح جاوبه واستريح

من هو:أحب شخص لقلبك فى الدنيا؟

أمى

انسان مستعد تضحي بحياتك - ركز فى كلمة حياتك - علشانه؟

أمى برضه

ما هو :اسم أجمل كتاب كتبه بشر قرأته ومحتفظ به حتى الان ؟

لا تحزن لعائض القرنى

اسم كتاب-كتبه بشر برضة- انت متعلق بيه وبتقرأه كل فترة؟

كيف تكسبين قلب زوجك – كتاب الالعاب

اهم جهاز منزلى انت متعلق بيه او بتستخدمه كتير ؟

الكمبيوتر انا ليا غيره

شىء تحس بالراحة النفسية عندما تنظر اليه ؟

البحر والسماء

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟

كان سطوح بيتنا وبعدين بنوا عليه

طبعا سطوح بيتنا مكنش شكله كده

مكان تحس بالراحة عندما تدخله ؟

شقتنا

اجمل مدينة زرتها داخل مصر ؟

بحبك يا اسكندرية

أجمل مكان طبيعي رأيته داخل مصر؟

بلدنا

لو شاطرين اعرفوها من الصورة

نوع هاتفك المحمول؟

نوكيا

سرعة بروسيسور جهازك ؟

2000جيجا هرتزحجم ذاكرة –هارد- جهازك ؟265 حجم الذاكرة – 80 سعة الهاردالمساحة التى تشغلها المواد الاسلامية على جهازك ؟

مش عارفة كام بالضبط

أهم هدف انت واضعه لحياتك دلوقتى ؟

1- إرضاء المولى عز وجل
2- التأثير فى المجتمع

صف ما يأتى :شعورك لما بتسمع كلمة مصر؟

إحباط شديد وأمل انه ممكن شىء يتصلح
بحبها بس اعمل ايه

شعورك لما بتسمع كلام عن اليهود ؟

إزاى الإنسان لما بيكون عنده هدف فعلا ومتمسك بيه بيقدر يحققه

شعورك لما بتشوف ظابط شرطة ؟

بقولى يا ترى هو حاسس بأيه دلوقتى

شعورك لما بتشوف الكناس العجوز فى الطريق ؟

بقول هى البلد دى مش هينصلح حالها بقه امتى الناس دى تتحسن اواضاعها والحكومة تحس بمعاناتهم الشديدة

لون البطانية اللى بتتغطى بيها فى الشتاء ؟

اللى بعده

لون الجورب-الشراب- المفضل لديك ؟

معنديش تفضيل فىا لموضوع دا

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟

بتمنى يكون واجهة مشرفة للدين فعلا وبحس انى مبسوطة

احساس يراودك فى اشارة مرور مغلقة بسبب مسئول كبير؟

بصراحة إحساس مدمر بكون نفسى انزل ادمر كل الموكب علشان نعدى وبيزداد كرهى اكتر للنظام واللى بيحصل

مسابقات مسابقات

السؤال الأول
1- صباح الخير بتتقال امتى
أ- فى الصبح
ب- بعد الصبح بدققتين كده
ج- بالليل

السؤال التانى
2- كام عدد اصابع اليد الواحدة
أ- عشرة
ب- سبعة
ج - خمسة
السؤال الثالث
3- انت بتصحى الصبح امتى
أ- الصبح بالليل
ب- الصبح بس
ج - الصبح الظهر كده يعنى
السؤال الرابع
4- كم عدد الأهرامات التلاتة فى مصر
أ- تلاثة
ب- تلاتة ونص
ج- تلاتة إلا ربع

وطبعا معروف تتصلوا على 0900787878787878

وهننصب عليكم وناخد فلوسكم متخافوش

لا حول ولا قوة إلا بالله
هكذا تطردنا الاسئلة الساذجة التى ليس لها أى معنى فى كل مكان التليفزيون الأف ام التى نسمعها فى المكيروباص كل يوم
وكأنها تقول للناس هنستهبلكم وناخد فلوسكم غصب عنكم
كمية من الاسئلة التى لا تعبر عن اى ثقافة
وتسمن ولا تغنى من جوع وحجم الاتصالات لا يقل عن مبالغ طائلة تكاد تكون تهدر فى الأرض
أنا لا أعول هذا الموضوع على طارحى الأسئلة لأنهم أناس لا يهمهم أى شىء سوى المكسب السريع والنصب على الناس مش اكتر
ولكن البشر للى بيتصلوا دول ليه بيتصلوا
لماذا حلم الثراء السريع يرواد جميع الناس ؟
ثراء دون عناء من جائزة او مسابقة ساذجة لن تضيف لمعلوماتك اى شىء
والناس تعلم جيدا إنها لن تفوز بل وتدفع للشركة النصابة دون أى وعى
انا نفسى الاقى تفسير من الناس اللى بتتصل
هل فعلا هى استفادت من السؤال وتحب ان تبارز بمعلوماتها
ام إن الناس فقدت قيمة العمل الجاد وباتت تبحث عن اى خرم أبرة للثراء
وبالرغم من فتوى العلماء بعد جواز الاشتراك فى هذ المسابقات
إلا إنها مازالت مستمرة ومعنى استمرارها أن مازال هناك أناس يتصلون بها
http://www.mooga.com/fatawa/answers_show.asp?question_id=6130
فى بدء الأمر كنت أظن ان هذه الشركات ستعلن إفلاسها فى القريب العاجل
شركات نغمات المحمول والمسابقات على 0900 وتنزل اصوات النجوم لكن من الواضح ان حجم الهايفة فى المجتمع اصبح بهذه الكمية
اصبحت الثقافة فى المجتمع هى ثقافة
كيف تسرق اخيك المواطن
ازاى تبقى اهيف من صاحبك
بداية من مسابقات ملكات الجمال وملوك الجمال وستار اكاديمى
وصوت لى صوت لى
صوتوا عليهم ساعة سكتوا
طب ليه الناس بيضحك عليه وهى مبسوطة اوى كده وعادى يعنى
يتنصب عليهم وهما ولا هما هنا
طب دا اسمه أمل؟
ولا هبل

سحر الشرق

السلام عليكم

انا عملت مدونة اخيرا بعد معاناة بس مش اوى يعنى بسيطة يعنى الحمد لله وبمساعدة بعض الناس ربنا يكرمهم يارب اولهم حبيبة تسلم لى

وبما ان مدونتى اسمها سحر الشرق فقلت احط شوية صور عن الشرق الساحر فعلا بداية لحد ما اشوف انا هقدر فعلا اكتب ولا مش هعرف وهعك

دى دبى ليلة رأس السنة