الاثنين، ٦ أغسطس ٢٠٠٧

يعنى ايه حرية

تغيبت لفترة طويلة عن المدونة ولكن بجد مكنش عندى نفس اوى للكتابة

برغم حدوث اشياء كثيرة كان من الممكن الكتابة عنها

بحاول وانا ماشية فى الشارع انى ابحث عن حاجة إيجابية علشان اكتب عنها

بس لحد دلوقتى لسه مفيش فكرة معينة إيجابية خلتنى اكتب عنها

لكن طبعا بالنسبة للأفكار السلبية فدا حدث ولا حرج

لما ببص فى تصرفات الناس بستغرب هى الناس شايفة الحرية دى ازاى

يعنى ايه حرية؟

اكتر الناس فاهمة الحرية دى يعنى تعمل اللى هى عاوزه فى الوقت اللى هى عاوزه بالطريقة اللى هى عاوزها دون ادنى مراعاة لأى ظروف أخرى

ناخد مثال على كده

عريس وعروسة فى زفة عربيات ومتوسكيلات كلهم ماشيين بشكل عشوائى وعروضة عسكرية بالموتسيكلات

وكلاكسات لا حصر لها


ولو اتكلمت وقلت ان دا غلط يبقى مش عاوز الناس تفرح ودا يوم ومش مشكلة

طب يا جماعة الواحد والله ما هو ضد إن الناس تفرح لكن احنا ثقافة الأفراح عندنا حرية بلا وعى

مثال أخر عندنا فرح فى الشارع شهر كامل وكل يوم الدى جى يشتغل من اول اليوم لأخره بأحط الأغانى السفيهة

اخر ما زهقت اضطررت انى اروح للناس واطلع لهم الشقة ودار هذا الحوار

انا : السلام عليكم انا جارتكم فى البيت اللى وراكم مش عارفة انام نهائى من الصوت العالى استأذنكم بس الصوت شوية

اهل البيت : يا اهلا اتفضلى اصل احنا عندنا فرح

انا : الف مبروك يا جماعة ربنا يتمم بخير يارب بس الصوت ارجوكم شوية

اهل البيت : ربنا يفرح الناس كلها دا فرح عقبالك وحاضر هنوطى شوية

انا : شكرا يا جماعة والف مبروك ولسان حالى ياريت متكرورهاش

هما الصراحة الصراحة طفوا الدى جى فى اليوم دا كله ومشتغلش تانى

وتانى يوم اشتغل تانى

هى دى الحرية من وجهة نظرهم

مثال أخر

واحد ماشى فى الشارع راكب عربية إن كان او ماشى على رجله بياكل اى حاجة

اسهل حاجة يرمى المخالفات فى الشارع

هو حر دا شارع الحكومة


انا مفهومى عن الحرية

ان فى فرق بين حرية التفكير وحرية التصرفات

التفكير بياخد مساحة كبيرة شوية من الحرية

اما التصرفات فهى ليست حرية مطلقة بل حرية مسئولة وتراعى حقوق الأخرين

بس ياريت لو حد عنده تعريف اخر للحرية يقولى عليه يمكن انا غلطانة



هناك ٢٣ تعليقًا:

الطائر الحزين يقول...

معك كل الحق

هذه تدوينة مرتبطة
http://sadbrd.blogspot.com/2007/06/blog-post_24.html
تحياتى

bedo يقول...

موضوع شائك جدا
أنا حر كلمة بتسمعها على طول لو جيت تنصح واحد أو قول رأيك

مع إن المفروض وزي ما الشرع بيقول أنت حر ما لم تضر

ولكن أعتقد أن اللي ماشي عندنا
إنته قول اللي إنته عاوزه وأنا أعمل اللي على مزاجي

وجزاكم الله خيرا

smraa alnil يقول...

ازيك يا سجدة

اعتقد اني قلتلك مفهومي عن الحرية واحنا بناكل كشري

فاكرة ولا اسيحلك اكتر من كدة
:))

بس انا لو منك كنت رحت للناس دي وعملت خناقة
او بلغت عنهم

مانتي عارفاني بحب الخير للكل
:))

أسامه يوسف يقول...

انت ساكنه فى شارعنا واللا إيه
بقالنا اسبوع كل يوم
يا حنه يا فرح يا افتتاح محل

انا شايف إن الحريه زى مابتقولى
هى حرية تفكير مع حرية التصرف بدون أن تضر الناس
وأضيف عليها
مايضرش نفسه

تحياتى

mohamed يقول...

عند بعض الناس ان الحرية هي الشماعه اللي بيعلقوا عليها تعاديتهم علي حقوق الاخرين

فقاقيع كلام ـ شروق الشمس يقول...

لو مكنتش الحرية تستخدم في مكانها الصحيح وبمعناها الأصلي

يبقى غير كدة تبقى بجاحة مش حرية

يعني لما تبقي نايمة في عز الليل وتصحي مخضوضة على صوت موتوسيكل راكبة واحد ـ بلاش نشتم ـ وكمان معلي التسجيل على آخره.. ويقولك حرية

ردي عليه وقولليله دي بجاحة يافندم
لأن اللي ميحسش بمتاعب الآخرين يبقى سوري مش عنده دم..

ومتعلمش يعني إيه حرية
عشان كدة بيدور على حاجة ينسب لها أخطاءه.. ومش بيلاقي كلمة أسهل من الحرية..

ربنا يهدي

قلب أبيــض يقول...

يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض

ابن رشد يقول...

الحكمة بتقول انت حر في ما لا تضر

طهقان يقول...

امسك عندك


ايه حكاية مفهوم الحرية مع طبق الكشري اللي بتقول عليه سمراء النيل دا؟

افصح
ابن



قول


فين ومع مين وبكام ؟

Desert cat يقول...

فعلا يا سجدة
كلامك كله صح بس يمكن الناس بتفرط فى الافراح من كتر الاحزان فوق دماغها والمشاكل اللى مبتنتهيش
لكن من حقنا نقعد فى بيوتنا مستريحين
يفرحوا بس يراعوا شعور الناس التانية حد تعبان او شئ من هذا القبيل
ولو اتكلمتى يقولك اصلهم بيحقدوا علينا
كل واحد ماخيل الشارع حكر ليه لوحده
ربنا يرحمنا

بسمه عبدالباسط يقول...

الحرية كلمة معناها كبير بس ناس كتير فهماها غلط ماشى أبقى حر وأعمل اللى أنا عايزة بس من غير ما يضر باقى الناس ولا بيكون بتعارض مع مصالحهم
ما هو مش معنى أنى حر أنى أقرف الناس
تحياتى لكى

محمد عبد الرحمن يقول...

السلام عليكم
كلامك صحيح ويتكرر مل ما سردت من مواقف
فهمك للحرية هو الفهم السليم طبعا لكن الخطأ مترسخ فى أذهان الناس وأصبح له من يبرره
شكرا على التدوينة الهادفة وجزاك الله خيرا

المهـ إلي الله ـاجر يقول...

جزاك الله خيرا

فعلا مفهوم الحرية ممسوخ في كثير من الأذهان وصارت الحرية في غياب القيود فوضي

ولقد تكلمت في آخر تدويناتي علي الحرية من منظور ديني فادعوكي لقرائتها

جزاك الله خيرا علي ما سطرته يداكي

Future_Preacher يقول...

السلام عليكم اختي الكريمة
والله ياريت المواضيع بتنتهي بالدي جي ده و بس
طب حقولك علي موقف
انا ساكنة في اسكندرية في منطقة - المفروض- انها الي حد ما راقية و كان من حوالي شهر كده او اكتر فرح في الشارع تقريبا برضه كان لمدة أسبوع و جاء اليوم اللي قبل الزفاف علي طول و كان يوم جمعة ....أكرر كان يوم جمعة بعد صلاة الجمعة مباشرة لقيت شارعنا ده اتقلب مسرح
فرقة حسب الله بتعزف و شوية بنات لابسين و مش لابسين و هاتك يا رقص لما وسطهم اتخلع و في وسط الشارع و الناس في حالة ازبهلال تاام لما يحدث
و العربيات مش عارفة تروح و لا يمين و لا شمال و تقريبا المولد ده انتهي قبل صلاة العصر بشوية
و انا بصراحة مش فاهمة بأي عقل اختاروا الزمن ده بالتحديد علشان يعملوا الكرنفال الشعبي ده سبحان الله يعني الناس تخرج من صلاة الجمعة تلاقي مسرح في الشارع فيه من الهجس و الدنس ما يصيب الانسان بالاشمئزاز
لو كانوا غير مسلمين لقلت انهم يستفزوننا كعادتهم و لكنهم مسلمين لان البنات اللي كانت بترقص كانوا لابسين حجاب استرتش
نسأل الله العفو و العافية

Future_Preacher يقول...

نسيت اقولك مدونتك جميلة و جزاكي الله خير عليها

نفسنا يقول...

ناس كتيرة فاهمة معنى الحرية غلط والمشكلة أنهم نفسهم مابيعجبهمش تصرفات الناس التانية ما هو لو كل واحد خد باله من نفسه كنا بقينا أحسن من زمان

نـــــــور يقول...

العزيزة سحر الشرق

معاكِ حق جدا في كلامك

المفروض في خطوط حمرا الناس تقف عندها

!وانت حر ما لم تضر

جزاكِ الله خيرا

ودمتِ بخير

أخف دم يقول...

هيه جت على كده بس ؟؟؟
لو كان المفهوم الخاطئ للحرية وقف عند كده يبقى كويس جدا .. احنا تجاوزنا لكل حاجة ف حياتنا والضغط النفسى والكبت والقهر اللى احنا عايشين فيه مخليه كل واحد مناخيره فى السما وحاسس ان مفيش حد يقدر يكلمه والمشكله انه مش بيتعالى إلا على أخوه اللى عايز مصلحته .. ويخاف جدا من اللى بينهبه ..
ربنا يلطف بينا

kafrawy يقول...

لالالالالالالالالالالا


حرية


ليبرالية


انت حر مالم تضر


اعمل اللى انا عايزة


لالالالالالالالالا


عيب الكلام دة لسة بدرى علية

انا بقول اهو


اللى عايز يعمل حاجة يعملها بعيد عننا

يا مراكبي يقول...

الحرية هي أن تفعل ما تريد فيما لا يتعدى حرية الآخرين

وعندنا في مصر طول الوقت بنتخطى حرية الآخرين

الشارع اللي الأخ رمى فيه الزبالة ده مش بتاع الحكومة ولا الحكومة بس هي اللي بتمشي فيه .. ده بتاع الناس كلها .. وبكده يبقى وسخ الشارع بتاع الناس كلها وتعدى على حريتهم في إن يكون عندهم كلهم شارع نظيف

وهكذا

إحنا محتاجين تربية من أول وجديد

سجدة يقول...

الطائر الحزين
تدوينة رائعة اتمنى الاستفادة وان يزداد وعى الناس بالحرية
---------------------
bedo
مش عارفين هنوصل لحد فين بالشكل دا

smraa alnil الاخت
طبعا الحرية مع طبق الكشرى حاجة تانية خاااااااااااالص
----------------------
الاخ أسامه يوسف
مشكلة بقه اطلع ساكنة فى شارعكوا وكل يوم دى جى ومعرفش اكتب براحتى عن الشارع
--------------------------

الاخ mohamed
كم من الحماقات التى ترتكب باسم الحرية
--------------------------

الاخت فقاقيع كلام ـ شروق الشمس
طب هيتعلم فين ما هو مفيش امكان لتعليم الحرية ولا غير الحرية
-------------------------------
الاخت قلب أبيــض
هو فين الوطن علشان يكون ليه معنى
-----------------------
shams الاخ
الحكمة اللى ماشية اليومين دول انت حر وتضر وبراحتك يا باشا
---------------------------
الاخ طهقان
لا كله إلا الحرية مع طبق الكشرى مش هقدر اقول فين وبكام ومين
دى اسرار مدونين مع بعض

-------------------
Desert cat الاخت
هى دى فعلا المشكلة انك لو كلمتى حد على علو الصوت فى الافراح هيقول ان دا حقد وانى عميلة مندسة

bos bos الأخت
الله يخرب بيت الإعلام والتعليم اللى وصولوا الناس للحالة المزرية دى
----------------------
الأخ طال الليل
وعليكم السلام
جزانا وإياكم
---------------------------
الاخ المهـ إلي الله ـاجر
للاسف الفوضى اصبحت متأصلة
وكلما نظرنا لمنظومة معينة وجدناها حاجة تفرح الصراحة
جزانا وإياكم


-----------------------------
Future_Preacher الاخت
والله صعبتى عليا مرة يوم جمعة لاقتى دى جى
يا حبيبتى احنا طول الصيف كل يوم جمعة لازم يكون فيه تنجيد فى الشارع والناس هوب تجييب دى جى يتشغل لحد الصلاة وبعدين يبطل وقت الصلاة شوفى التقوى
ويكمل تانى للمغرب واخبطى راسك فى اكبر حيط
انتى اللى جميلة نورتى المدونة
---------------------------
الاخت نفسنا
لازم يكون فيه منظمة تدافع عن الناس وعن حريتهم بشكل معقول

------------------------
الاخت نور
دا بقه فى عمى الوان لا خطوط حمرا ولا زرقا ولا اى حاجة
-------------------------
الأخ أخف دم
ربنا يلطف بينا قبل ما الواحد دماغه تطق
إلا متعرفش مين مخترع الدى جى
-------------------------
kafrawy العزيز
حاضر يا فندم بعيد جدا اصل هنرش
----------------------------
العزيز يا مراكبي
تربية والله كلنا محتاجين تربية من جديد وتدمير بعض المفاهيم اللى جبتنا ورا دى

دولة خرابستان العظمى يقول...

سجده الاول قبل بدايه الكلام اسمك جميل
تانى حاجه
الحرية مفهوم فضفاض وواسع كلة بيفسره على مزاجه
بس انا اتعلمت حاجة حلوه اوى من يوسف السباعى
اتعلمت ان احنا ما ننقدش الناس وما نقولش ايه اللى بيعملوه ده لانهم شايفين اللى بيعملوه صح بدليل انهم بيعملوه
ولاننا لو مكانهم هنعمل زيهم
فمثلا المدونات بتضايق الحكومة صح وشايفاها انها تطاول عليها احنا شايفنها حريه لو احنا مكان الحكومه هنشوفها بطريقتهم
يعنى مثلا فى فلسطين قانون الصحافه اللى اتعمل سنه 95 عن طريق منظمه فتح حماس فعلتة وهتشتغل بيه فى غزه تروح فتح عامله قلق وتقول انهم بيقيدوا حريه الصحافه
فتح شايفاه غلط دلوقتى لانها بعيد عن الحكم وحماس كانت شايفاه غلط ولما اتبدلت الصوره حماس طبقته وفتح عارضته مع انها هى اللى عاملاه
فى الحريه فى وجه نظر الاخرين هى تقيد لحريتى من وجه نظرى لكن الحريه الصحيحه هى ان نمارسها دون ان اسئ الى الاخرين
وبالنسبه لموضوع الزباله اللى بتترمى فى الشارع ما هو الشارع مزبله اساسا والحكومه قاصده انه يبقى مزبله
العيب مش فى اللى بيرمى الزباله فى الشارع العيب فى اللى محطش صناديق زباله

Zaeem Arif يقول...
أزال المؤلف هذا التعليق.